Socrate 5 : adan bik-Vodoum la

Ki sé Vodou Ayisyen, Santériya Brézilyen, Kondonmblé Kiben é menm lè ou byen gadé tibwen adan Kenbwa Gwada, yotout ni sous a-yo adan Vodoum an péyi Bénin ola nou yé. Bik a tout gran Kwayandiz-lasa ka touvé-y a Ouidah. Ou ni jaden Granbwa-sakré ola ou tousa konmansé èvè dotwa géryé i té sòti Togo p’asi 15zyèm syèk la. Lè ou adan jaden-lasa ou ka vwè kalité gran pyébwa sakré k’on Iroko vyé pasé 400 lanné, mé ou ka kontré èstati a plizyè divinité Vodoum.

Mi foto a yonndé adan-yo, kontèl Legba prèmyé gason Bondyé. Si nou ka vwè-y èvè sèks a-y byen doubout sé pou di sè li ka kontwolé é ka pwotéjé tout kaz, kant a pou zafè kòn nou ka vwè-y tini sé davwa sé rèlijyon-vini la ka toujou chèché dyabolizé Vodoum pou fè moun pè, okonmsman Lègba pa té tini p’on kòn.

Prensipal fondas a Vodoum sé Dangbé, Sèpan-Piton-la. Lè ou ka pran tan gadé bò zyé sèpan-lasa, ou ka vwè konsidiré 5 koul grif. Sé sé menm koul grif-lasa ou ka vwè asi figi a tout moun-aktif adan rèlijyon Vodoum.

Lè nou sòti adan jaden Granbwa-Sakré la, nou rivé adan tamp a Dangbé ola ou ka woté soulyé pou rantré andidan-y pou ou ay nétwayé tousa i pa sen adan-w. Adan tamp-la adan chak tikwen, ou ka vwè on Sèpan-Piton ka dòmi. Lè ou sòti la, yo ka mandé-w mété yonn alantou kou a-w pou fin pwopté-w. An pa ka manti di-zòt mwenmenm an-mwen an di : awa, a pa pou mwen ! Epi, ka i pasé an tèt an-mwen, ès sé padavwa an vwè sé madanm-la i té èvè-nou la fè-y, an lésé-yo mété Dagbé an kou an-mwen … kolyé fwèt-la détann tout kò an-mwen. Mwen anni santi-mwen byen, sitèlman byen ! Dangbé sé on bon bèt, fo toutmun pwojé-y !

Dèmen nou ké vwè Ouidah sé osi prensipal laplas lèsklavaj.