RAVIN-AN TÉ SEK ABO MAN TÉ FINI TANN DLO TÉ KA KOULÉ ADAN'Y

   Man té ka ponmnen lakanpay ek soley-la té ka pété anlè tet-mwen an manniè anrajé épi man anni swef toubannman.

   A lè tala, man tann konsidiré man té pa koté an ravin épi man santi fréchè'y ka monté dépi pié-mwen pou rivé jis anlè fidji-mwen. An vérité, dousinaj-tala anni soulajé mwen flap-flap. Alos, man alé bò ravin-an anmizi-anmizi, men man wè ravin-an té sek abo man té fini tann dlo té ka koulé adan'y.

   Alos, man mandé kò-mwen kon sa es sé pa an lespri-mwen dlo-tala té anni sòti.

   Épi, ki kalté dlo, Bondié? Dlo pé pa anni pran lavol kon sa adan an ravin ! Men, adan ravin-tala, i té rété woch épi sé tout ek pa menm té rété an ti-zizing dlo ka koulé adan'y.

   Kidonk, man mandé kò-mwen es sé pa té menm dlo ravin-an man té ka tann an lè man té an timanmay.

   Mèyè jou-tala lanati té lé di mwen kon sa : 

   " An tout manniè, ou key toujou tann dlo-a koulé andan an ravin abo ou pa key wè'y pas ravin-tala key sek. Pa janmen blié koté ou sòti timanmay pas mi sé sa léritaj an moun.

  Sé sa i ka chayé dèyè'y, sé sa i za tann, sé sa i za wè, sé sa i za santi kivédi sé trézò zanset-li kité ba'y.

   Trézò-tala, ou key pou katjilé anley, pokosionné'y épi ba an lot moun-li'y. "

   Lanati, mi sa man pé di'w jòdijou : 

   "Man ka di'w mèsi pou tout bagay ou za poté ba mwen, kontel manjé ek dlo pas sé bagay ki pli pòtalan ba an moun.

   Mèsi anpil tou ba bri dlo ravin-an ou koré andan kabech-mwen an pas atjèman man pé pa swef ankò. Kidonk, man key pé kontinié lawout lavi-mwen an manniè obidjoul.

    Men, man key kontinié'y épi'w pas man bizwen'w anchay ek man sav ou pa key janmen ladjé-mwen. Dayè-pou-yonn, man toujou ka tann ou ek santi'w toupatou, menm si man pa ka wè'w. "