Se presenta un documentari sus la persecucion del catalan per la justícia francesa

Lo filme, entitolat Lo catalan davant los jutges, se presentèt dimars a Elna e serà emés per TV3 dimenge que ven

Se presentèt dimars dins lo cinèma d’Elna, en Catalonha Nòrd, lo documentari El català a judici (Lo catalan davant los jutges), realizat per la còla de la Television de Catalonha per Frame Creative Media. Lo documentari serà emés sus TV3 dimenge que ven, 17 de julhet, a 22h05.

Lo filme explica cossí lo Tribunal Administratiu de Montpelhièr decidiguèt d’enebir l’usatge del catalan dins los conselhs municipals de las comunas d’Elna, Els Banys, Portvendres, Tarerac e Sant Andreu de Sureda. Aquelas municipalitats avián modificat lor reglament interior per tal que lors elegits aguèsson la possibilitat de deliberar oralament e per escrich en catalan mas amb la traduccion en francés apuèi.

Lo filme documentari, delà la question politica, s’interèssa tanben a l’estat del catalan en Catalonha Nòrd: qual lo parla, quina es la responsabililtat de l’estat francés per sa davalada progressiva coma lenga d’usatge social e quin ròtle jògan las escòlas immersivas coma Bressola o Arrels per lo reviudar.

Se presenta un documentari sus la persecucion del catalan per la justícia francesa