On gran-difé Foufou é sé lézòt zannimo-la. (dapré on pawòl anparabòl a Kalina)
On sakré papa difé té ka manjé péyi-la.
Zannimo té ozabwa.
Déserten adan yo té ka chaché
ola pou yo té fouré kò a-yo alabri
dòt té rété olwen ka gadé.
Foufou, li, té ka ba kò a-y bann
kay chèché on ti dégout dlo
adan on ma i pa té lwen
pou ay jété-y asi difé-la
épi aprésa i té ka woukonmansé.
Afòs vwè-y k’alé-vini Gouti fè on koul kòlè.
- Foufou o !
Las monté-désann kon ou ka fè la !
Ou ka boufi-nou é sa pa sèvi ahak !
Plisimyé ou chèché gadévwè
ola ou kay pé garé kò a-w
é fouté moun lapé !
Mé a pa pou Foufou, i kontinyé fè zafè a-y.
Malfini, i sé on zozyo osi, palé ba Foufou
- Mé Foufou, ou mèyè pèd-lakat !
- Ou pa ka vwè ou pé ké rivé étenn difé-lasa
- vou tousèl-tousèl a-w !
Foufou pwan jistikont on zing tan
pou té réponn :
- An konnèt tousa ou ka di la
mé kanmenmsa mwen
an ka fè pa an-mwen !
Epi i kontinyé fè pa a-y.
- Se connecter ou s'inscrire pour publier un commentaire
- 12 vues
