Lè i rivé laéwopò Pol Karayib, nan péyi Gwadloup, Man Marine Le Pen té kwè zafè'y té bel. Pou-tout-bon, an bon santenn moun té vini akéyi'y, drapo fwansé ka fè siwawa ek tanbou gwoka ka bat alé-pou-viré.
Apré sa, i ay fè an ti lantoun pa koté an lizin dlo nan komin Kapestè épi menm jou-oswè-tala, GWADLOUP 1è té envité'y pou fè an dé-mo-kozé adan an lotel. Mé, biten-la enki chalviré si'y ! Bagay-la anni maté bligidip ! Militan a ANG (Alyans Nasional Gwadloup) anvayi plato-a ek gad-di-kò Marine té bliyé chayé'y alé vitman-dépéché.
Ka manzel té konpwann ?
I dwet té bliyé ki Matinik ek Gwadloup té opozé avion papa'y, Jan-Mari, atéri asi laéwopò Matinik ek ta Gwadloup la ni pasé 20 lanné di sa. Misié touvé'y oblijé déviré an Fwans menm jou-a kivédi i té fè 16h abò avion adan menm jouné-la. Mi bab ! Fi-li a, kivédi Marine, lè zot vwè i pwan parti a an lanmen'y, té mété papa'y déwò, bokanté non parti-a ("Front National" enki vini "Rassemblement Nasional"), pou koumansé sa jounalis kriyé "dézonbifikasion". Ka sa yé ? Enben, Marine koumansé anmwennzi, diminié plodari rasis parti'y la. I koumansé pa ka voyé woch san rété, kon Jan-Mari té ni labitid fè, kont Neg, Arab épi Juif. Manzel éséyé fè moun kwè i pa té adan zafè rasis-la ankò !
Men, an bagay i dwet pa sav, sé ki Neg pa tèbè kon i ka kwè. Sé pou sa, yè oswè, sé militan nasionalis la anni fè'y pwan lawol toubannman !
WOULO-BRAVO !
...quelques informations tout de même. Lire la suite
...détectées par le hacker me dit-on mais les responsables du site refusent de les rendre publiqu Lire la suite
...du numérique" sera assez fin et roué pour détecter TOUTES les différentes adresses IP de l’ind Lire la suite
...parvenir à identifier les fouteurs de merde qui, sous des pseudonymes divers et variés s'amuse Lire la suite
Il est à la fois grotesque et ridicule d'accuser Fondas de ne montrer que "80 personnes sur 120.0 Lire la suite