Simenn blé
Anri dépi yonndé tan, bokanté non, tout tjoum-li ka kriyé’y: Anri-tret. Eben pliziè komin ka mété yo an valè, pas lè ou laritret sa pa lé di, ou pa adan sosiété-a.
Ou toujou ka genyen manjé (menmsi ou pa bliyé kouri an libsèvis). Ou toujou ka péyé lenpo é vié kay-la ka koumansé fè’w sav, li tou i bizwen yo otjipé di’y. Ou toujou ka mété lésans adan loto’w. Lè ou laritret ou ni mwens lajan mé ou ni otan dépans. Ou toujou ni yich ek ti-yich pou otjipé di yo.
Mwa woz
Koumansman mwa sé pou chonjé tousa ka soufè épi krab-la. Anlo asosiasion ka goumen kon chat meg dan zaboka vet. Menmsi tété pa janmen two lou pou lestonmak, ni anlo madanm éti lestonmak yo ka mantjé an tété ek délè dé, pas krab la atatjé’y. Eben manmay fok nou soutni sa ka goumen kontel: Matété oben Les Amazones épi kisasayésa ka kontinié djoubaté pou endé fanm mé nonm tou, ka soufè épi krab-la. Asiparé kom ki diré nou té ké chanpion dimond an zafè lapostat-la.
Laéwopò Gwadloup-Marise Condé
Dépi dimanch 29 septanm, laéwopò Raizet bokanté non, yo batizé’y Laéwopò Gwadloup-Mariz Kondé».
Adjilbè konnet an boug éti té alé fè an won an Frans. Lè misié té ka déviré Gwadloup i té estébékwé lè kòmandan-an di tou fò an mikro-a: «Nous arrivons à l’aéroport Guadeloupe-Marise Condé» tout moun ann avion-an fè an bel waka afos yo té jwa, dan yo té ka fè sik. Mé ni an boug ann avion-an, i rété nofrap. Pétet pas jik atjelman i poko li pies liv madanm-tala. Ajijéwè «Siklòn Igo» an liv madanm-lan mofwazé an kréyol. Magré Mariz Kondé anpami sel fanm ki risivrè «Pri Nobel altènatif litérati».
Mwa oktob-la sé mwa tou pou chonjé Jounen Entènasional Lang Kréyol. Mé kréyol sé pa selman an sel mwa, pétet fok nou djoubaté tout lanné-a. E sa ka fè plézi lè nou aprann 90 metlékol trapé abitilitasion pou kréyol-latit anbonni. Konba kréyol sé toulongalé.
Jid
Not pou konprann
Le mois d’octobre il y a des manifestations pour le grand âge «Octobre bleu» mais aussi «Octobre rose» sur le cancer.
Bel poveb kréyol 774
«Tété pa janmen two lou pou lestonmak».
- Se connecter ou s'inscrire pour publier un commentaire
- 56 vues
