Defans

Referans-lan voye de-san-senkant gadkaka pou kraze-brize aksion sista èk brada lòt Matnik-la (la eti moun ka rele nou "lòt Gwadloup-la").

Se sa sèlman gouvèlman-an jwenn pou fè : eseye simen panik èvè mounzanm kouvè epi blendaj, ki ni fizi epi vre bal adan pou yo sa tire – kon sa sòti fèt Wotèdanm lan.

Ès se le yo le vire fè masak Me-67 la ? An tchwezon boug-la ki te jeneral pase prezidan siyen (li ki, de mwa apre sa i fè Pwentapit la, voye : « Viv Kebèk lib la ») Èk yo te mete krim-ta-a anlè kont GÒNG-lan – Group Òganizasion nasionnal se Gwadloupeyen-an.

Jòdijou, yo le fè nou kwè yo ka debatche pas ni violans : baraj, tomobil ka brile, magazen piye èk mounzanm ka pran kout fizi.

Yonnman, mwen pa dakò epi moun ka konmèt se vakabonnajri-ta-a. Asire yo ni kòz – baraj se pas se moun-lan bare,

dife se pas yo pa ka wè chimen yo se pe pran,

piyaj se pas, nòwmalman, yo pa pe, yo pa pou trape pa an patat,

tire anlè mounzanm se pas yo tounen mounzanm yo-menm rapòta tousa yo jwenn depi pititans-yo : rache-koupe papa, rache-koupe manman, rache-koupe kanmarad, rache-koupe an bimidòmaj ki chaye ale konpè, fanmi, rache-koupe an kolonizman ki pa ka sispann mete moun òtbò-dlo a nan tout plas ki ni (mounzanm, prefe, machann, enstit, dirèktè, mason...), rache-koupe klòdekòn-lan ki ka simen kansè adan prostat-la, parkinsonn, twoub dekatman sèvo ti manmay eti manman-yo, nan tan sitiyasion-yo-a, te anba pèstisid-ta-a maten, midi, oswè, rache-koupe adan zafè disparètman Gwadloup la – me se vakabonnajri-a pa ni sans.

Asire pa petèt nan bout leta-a Gwadloup ye a, ke ni an libètasion pas moun ke sa ize feblès-yo, tout kalte feblès yo ke sanble pou jwenn fòs-yo.

Katapou Referans-lan, sèl bagay i sa rikonnèt se li-menm. Kidonk i ke toujou sèvi gadkaka pou kontinie atatche Gwadloupeyenn, Gwadloupeyen pou eseye mate yo.

Alò se defansè Gwadloup-la pou sav se pa mwen yonn, se pa de moun, ni twa,

se an patche brada, sista ki epi zòt kotesit...

Jera Nikola